گزارش از علی تورانی
زیبو آن و بونی یگ قوم استہ کی دہ دورونی دور دیرازی تاریخی قد رقم روقومی آلینے خو از دووری بایہ کلونا در مو رسید ہ. کی بلدے دہ وجود امدون شی چندیو ووروغی از مو یگ از پاسی دیگہ دیرے شی رہ یگ دہ بل دیگہ چیندہ امدہ تا کی دیوالی زیبو رہ بال کدہ. دہ ای سری روز پگ اولوسی دونیا دہ وائن شی ای تورہ رسیدہ کی زیبو بلدے اینسانا چیقس کار آمد استہ. امزو بلدے زیندہ نیگا کدو و بال بورشوی زیبونی آبئی گی خو زوری اینسانای زیندے روئی زیمی خواری میکشہ.و از دووری ایدارے یونیسکو ۲۱ فروری روزی زیبونی آبئی گی دہ بستہ دونیا گیریفتہ تا کی دہ سالی یگ دفہ دہ دیلی اولوسی دونیا از قستی دیل ڈگ بوخرہ کی زیبون خورہ پورموشت نکنہ.
آزرگی اکیڈمی کوئیٹہ پاکستان ام بلدے زیندہ نیگا کدو قد بال بورشوی زیبونی آزرگی از چندین سال استہ کی تکو مونہ و ایم دفہ دہ روزائی ۲۰ و ۲۱ فروری وار پیدا کد کی روزی زیبونی آبئی گی رہ قد بستہ اولوسی پاکیستان دہ پایتختی ازی مولگ دہ شاری ایسلام آباد بیگرہ ۔ روزی زیبونی آبئی گی رہ ایدارے “لوک ورثہ قد اینڈس کلچرل دہ کومگی “ادارہ استحکام شرکتی ترقی دہ “لوک ورثہ” میلے ادبی زیبونای پاکیستانی رہ گیریفتد کی دہ ای میلہ از بستہ پاکیستان نومائیندائی ۱۷ زیبونائی پاکیستانی شریگ شودد دہ ای کٹہ برنامہ نومائیندائی آزرگی اکیڈمی، علی تورانی، قادر نائل، علی ھمدم قد مصطفی ایلخانی ام شریگ شودد.
دہ ای دو روزنہ میلہ دہ اولنہ روز نومائیندے آزرگی اکیڈمی علی تورانی دہ بارے پگ جو شودونی زیبونای پاکستانی تورہ گوئی کد۔ قد ازی قتی ای تورہ رہ ام دستو کد کی زیبونی آزرگی ام دہ قتاری ازو زیبونا دہ اوگل میہ کی یگمے گوئیندای شی ای رہ پورموشت مونہ یا ای کی از وجود شی مونکیرہ. قادر نائل دہ بارے کیرداری رسانہ دہ بارے زیبو تورہ گوئی کدہ گوفت کی رسانہ کار شی بلدے بال بورشوی زیبوچیقس کار آمد استہ.روزی اول دہ آخیری برنامہ جمشودی قستہ گوئی دہ مینکلی ۲۰ زیبونائی پاکیستان سریشتہ شودد کی قادر نائل قد مصطفی ایلخانی دہ زیبونی آزرگی قستہ خانی کد. دویومنہ روزعلی تورانی دہ بارے کیرداری اکیڈمی بلدے بال بورشوی زیبونی آزرگی ، علی ہمدم دہ بارے کیرداری آزرگی اکیڈمی بلدے ریواج ددوو بال بور شوی آزرگی و نیگا کدونی رسمی آزرگی قد موشکیل کی اولوسی آزرہ قد شی سر دوچار استہ، تورہ گوئی کد.مصطفی ایلخانی دہ بارے قستائی اوجارلہ دہ آزرگی تورائی دیل خورہ گوفت۔ فاطمہ ھاتف دہ بارے کیرداری زیبونائی آبئی گی بلدے اووردونی امنیت و آشتی تورہ گوئی کد. دہ ای دورو مصطفی ایلخانی کارٹونی بوزی چینی رہ بلدے نومائیش ایشت. دہ تامو شودونی برنامہ وزیری آوال رسندو و نشریاتی پاکیستان سنیٹر پرویز رشید از نومائیدے اکیڈمی دمبورہ سوغاد گیریفت.سر کردے ” لوک ورثہ’ ڈاکتر فوزیہ سید از سر میر و میری دویوم دمبورہ و کیتابائی آزرگی سوغاد گیریفتہ و قد نومائیندائی اکیڈمی تورہ گوئی کد۔ نومائیندے اکیڈمی قادر نائل اوشرون سنیٹر پرویز رشید رہ سون دووری وختی برنامہ نشر کدونی آزرگی از پاکستان ٹیلی ویژن کدہ گوفت کی از مینکلی چار زیبونائی بلوچیستانی سے شی وخت برنامہ درہ و زیبونی آزرگی رہ دہ ٹیلی ویژن وخت ددہ نشودہ ، پرویز رشید دیلاسائی دد کی بلدے زیبونی آزرگی ام دہ پاکیستان ٹیلی ویژن وخت ددہ موشہ . دہ آخیری برنامے موسیقی دہ رقم رقم زیبونائی پاکیستانی ام گیریفتہ شود.
