نمیشته از علی تورانی
آذرگی اکادمی دہ کوئیٹہ پاکیستان او ایدارے ادبی و ایلمی یہ کی از دورونی چندین سال موشہ کی بلدے بال بور شو کدونی زیبونی آذرگی از وس خو ام غدر تر تکو مونہ.
زیبونی آذرگی او زیبو یہ کی از گا تا تیس رہ خوندہ گون شی از شی دیل خونوگ و روی گردو یہ. تا اندازہ رہ کی زوری یای شی از زیبون خو بیخی پیط مونکیرہ. مگم سر ازو ام جوانوی آدیری قوم توغی آذرگی رہ از کوئیٹہ بال کدہ و قد یگ دیگے خو از قستی دیل پیمو کدہ کی ازی باد اوشرون خورہ سون زیبونی آبئی گی خو بوردہ بلدے بال بورشو شی تا کی وس درہ تکو مونہ.
آذرگی اکادمی قد دیگہ سرگرمی یا٬ قتی یادی ازو کٹہ سری قوم شهید حسین علی یوسفی رہ ام تازہ کدد کی دہ دیلی تریکی شاوی تریگ چیراغی آزرہ و آذرگی رہ داغ مونہ . غیتای شی بود کی شهید یوسفی خود شی شم وری دہ شاوی تریکی تنا موسوخت و دہ گیرد گوشے خو روشنیگی رہ تید موکد تاکی از یگ شم شمائی دیگہ داغ شودہ بورہ.
شهید یوسفی اگہ از یگ دوور دہ کارائی سیاسی پیش دیست بود از دیگہ دوور از پگ کٹہ آرزوی شی ای ام بود کی چیراغی زیبونی آذرگی دہ مینکلی اولوسی آزرہ دغ شونہ تا کی دہ روشنیگی شی ای قومی تا اوفتاد قد رنگی خود خو شینختہ شونہ. او گیمی کٹہ کی دہ دیلی شئید یوسفی بود،رفیقونی آذرگی اکادمی او گیم شی رہ تا اندازہ رہ پور کدہ دہ ای سری روز آذرگی رہ دہ بستہ دونیا توگل کدہ .
آذرگی اکادمی دہ یادی شهید حسین علی یوسفی یگ جمشودی قستہ گوئی رہ دہ یادی روزی شهید شودونی یوسفی سریشتہ کدد کی دہ ای جمشود قستہ گویا قد قستای نوربن نوربن خو ایلپری ازی شم رہ جلو تر کد کی شهید یوسفی داغ کدد. جارچی ازی جمشود طیبہ فیاض بود کی قد تورائی دیل جلون خو ای جمشود رہ رونق شی کلو تر کدد.
قستہ گویائی کی دہ ای جمشود قستہ گوئی کد نامای شی دہ پیدمویہ: علی تورانی، قادر نائل، عزیز فیاض، اقبال رجائی، ایاز بے نام، عباس رستمی، ماسٹر مشتاق، جواد آزرہ، رازق کوہزاد، سیما سحر، علی ہمدم، صوفیہ وفا، مصطفی ایلخانی، نثار احمد کوہزاد، سائسہ باتور، عوض تورانی، امان یلتای.
